بابراعظم کے بارے میں بیان دینے کے بعد شاہد آفریدی نے محمد عامر کو فون کر کے کیا کہا؟ بڑی خبر

کراچی (24 نیوزپی کے) قومی کرکٹ ٹیم کے سابق کپتان اور مایہ ناز آلراؤنڈر شاہد خان آفریدی نے محمد عامر اور بابر اعظم کے تنازع پر خود فاسٹ بولر سے گفتگو کی ہے۔

ایک نجی چینل پر گفتگو کرتے ہوئے سابق کپتان شاہد خان آفریدی نے محمد عامر کے بارے میں بات کرتے ہوئے بتایا کہ میں نے ان کو میسج کیا اور ان سے بات ہوئی ان کو عزت بھی دی اور ان کو ڈانٹا بھی۔ شاہد خان آفریدی نے کہا کہ میں نے عامر سے کہا کہ کیا چاہ رہے ہو، اتنی آپ نے عزت کمائی ہے، آپ پر ایک دھبہ لگا ہوا تھا جس سے آپ واپس آئے ہو، آپ دوبارہ کرکٹ میں آئے ہو اور دوبارہ زندہ ہوئے ہو۔شاہد خان آفریدی نے بتایا کہ اگر کوئی کھلاڑی پرفارم کررہا ہو یا نہ کر رہا ہو میری عادت ہے اس سے بات کرنے کی۔

سابق کپتان شاہد خان آفریدی نے کہا کہ آپ کرنا کیا چاہ رہے ہو، یہ کوئی طریقہ ہے، جونیر لڑکے آپ کے سامنے کھیل رہے ہیں اور آپ غلط الفاظ استعمال کرر ہے ہو۔سابق کپتان شاہد خان آفریدی نے محمد عامر کو کہا کہ اگر آپ نے پاکستان کے لیے کھیلنا ہے تو آپ کو بابر اعظم کے ساتھ ہی کھیلنا ہوگا، کیا آپ کل اس کے ساتھ آنکھیں ملا پاؤ گے، کیا اس کی کپتانی میں کھیل پاؤ گے؟ سابق کپتان نے بتایا کہ دوران گفتگو عامر نے اپنی غلطی مانی اور معذرت کی اور میرا شکریہ ادا کرتے ہوئے کہا کہ آپ نے یہ بات نوٹس کی۔

سابق کپتان شاہد آفریدی نے کہا کہ امید کرتا ہوں محمد عامر اگلے میچوں میں آپ لوگوں کو بہتر سے بہتر نظر آئے گا۔شاہد آفریدی نے محمد عامر کو خود پر کنٹرول رکھنے اور اپنی کارکردگی پر توجہ دینے کا مشورہ بھی دیا۔آپ کو بتاتے چلیں کہ پی ایس ایل 8 سے قبل کراچی کنگز کی نمائندگی کرنے والے فاسٹ باؤلر محمد عامر نے کہا تھا کہ میرے لیے بابر اعظم اور ٹیل اینڈر کو بولنگ کروانا یکساں ہے۔محمد عامر نے کہا تھا کہ میرا کسی سے کوئی مقابلہ نہیں ہے، میرے لیے بابر بھی ویسا ہی ہے جیسے ٹیل اینڈر کھیل رہا ہو، میرا کام ہے ٹیم کو وکٹیں لے کر دینا۔