قومی ٹیم آئندہ برس نیوزی لینڈ کیخلاف 10 ٹی 20 میچز کھیلے گی

لاہور(24 نیوز پی کے)اگلے سال پاکستان اور نیوزی لینڈ کے درمیان 10 ٹی 20 میچز کھیلے جائیں گے۔دونوں ٹیموں کو ان میچز سےٹی 20 ورلڈ کپ کی تیاری کا بھرپور موقع ملے گا۔ پاکستان کرکٹ بورڈ کے مطابق دونوں بورڈز باہمی مشاورت سے 10 میچز کے انعقاد پر راضی ہوئے ہیں،دس میچوں کو دو حصوں میں تقسیم کیا گیا ہے۔پہلے حصے میں پانچ ٹی 20 میچ جنوری میں کھیلے جائیں گے یہ میچز نیوزی لینڈ میں کھیلے جائیں گے جبکہ باقی پانچ میچ پاکستان میں اپریل میں کھیلے جائیں گے۔نیوزی لینڈ میں کھیلے جانے والے پانچ میز 12 سے 21 جنوری تک ہونگے۔

پہلا میچ 12 جنوری کو آکلینڈ، 14 جنوری کو ہملٹن ،17 جنوری کو ڈیونیڈن جبکہ 19 اور 21 جنوری کو کرائسٹ چرچ میں میچز ہوں گے۔ پی سی بی کے مطابق اپریل میں پاکستان میں ہونے والے 5 میچز کا شیڈول بعد میں جاری کیا جائے گا، قومی ٹیم آسٹریلیا میں سیریز کھیلنے کے بعد براہ راست نیوزی لینڈ پہنچے گی۔