'میرے لیے بابر اعظم اور ٹیل اینڈر کو باو لنگ کروانا یکساں ہے،محمد عامر کا متنازعہ بیان

کراچی(24 نیوز پی کے) قومی کرکٹ ٹیم کے فاسٹ بولر اور پی ایس ایل میں کراچی کنگز کی نمائندگی کرنے والے محمد عامر کا کہنا ہے کہ ان کے لیے بابر اعظم اور ٹیل اینڈر کو بولنگ کروانا یکساں ہے۔

نجی ٹی وی چینل اے آ ر وائی کو انٹرویو دیتے ہوئے سابق فاسٹ باؤلر محمد عامر سے سوال کیا گیا کہ 'سوشل میڈیا پر کہا جارہا ہے کہ پشاور اور کراچی کا میچ بابر بمقابلہ عامر ہوگا تو کیا اس میں حقیقت ہے؟'جواب میں کراچی کنگز کے فاسٹ باؤلر محمد عامر نے کہا 'میرا کسی سے کوئی مقابلہ نہیں ہے، میرے لیے بابر بھی ویسا ہی ہے جیسے ٹیل اینڈر کھیل رہا ہو، میرا کام ہے ٹیم کو وکٹس لے کر دینا'۔عامر نے مزید کہا 'پھر چاہے بابر اعظم وکٹ پر کھڑے ہوں یا نمبر 10 کا بیٹر ہو، میں نے کوشش کرنی ہے کہ ٹیم کو وکٹیں لے کر دوں، میں نے کوئی جاکر ویلنٹائن کے پھول تو دینے نہیں ہیں، تو کوشش کرتا ہوں کہ میچ جتواؤں'۔

محمد عامر نے اپنا موازنہ قومی ٹیم کے فاسٹ بولرشاہین شاہ آفریدی سے کرنے پر کہا کہ 'میرا کسی سے کوئی مقابلہ نہیں، شاہین کی اپنی کلاس ہے اور میرا اپنا سٹائل ہے۔انہوں نے کہا کہ کھیل کے میدان میں میچز کے دوران کھلاڑیوں کی میدان میں دشمنی مجھے اچھی لگتی ہے جس سے نئے چیلنجز پر توجہ مرکوز ہوجاتی ہے۔