• 24News pk

وزیراعظم عمران خان کی مختلف شعبوں سے تعلق رکھنے والی کامیاب کاروباری شخصیات کے وفد سے گفتگو


اسلام آباد ۔ 2 ستمبر: وزیراعظم عمران خان نے کہا ہے کہ موجودہ حکومت کی ترجیح کاروباری سرگرمیوں کا فروغ اور ان کو ممکن حد تک مراعات دینے کے ساتھ ساتھ حائل رکاوٹوں و مشکلات کو دور کرنا اور کاروبار کے لئے موافق فضا میسر کرنا ہے، کاروبار سے منسلک نوجوانوں کو سہولیات فراہم کی جائیں گی۔ ان خیالات کا اظہار انہوں نے بدھ کو یہاں مختلف شعبوں سے تعلق رکھنے والی کامیاب کاروباری شخصیات کے وفد سے گفتگو کرتے ہوئے کیا۔ ملاقات میں وفاقی وزیر اطلاعات سینٹر شبلی فراز، وزیرِ صنعت محمد حماد اظہر، مشیر تجارت عبدالرزاق داو¿د، مشیر خزانہ ڈاکٹر عبدالحفیظ شیخ، مشیر ادارہ جاتی اصلاحات ڈاکٹر عشرت حسین ، معاون خصوصی ڈاکٹر شہباز گل، چئیرمین سرمایہ کاری بورڈ عاطف بخاری بھی شریک تھے۔


کامیاب اور نوجوان کاروباری شخصیات کا تعلق آئی ٹی، سپورٹس گڈز، فیشن اینڈ ٹیکسٹائل، بیوٹی انڈسٹری، پاک ویلز، و دیگر شعبوں سے تھا۔ وزیراعظم آفس کے میڈیا ونگ کے مطابق وفد نے اپنے متعلقہ شعبہ جات میں کاروباری تجربات ، حکومت کی پالیسیوں کے اثرات اور کاروباری فضا کو مزید بہتر بنانے کے حوالے سے مختلف تجاویز وزیرِ اعظم کو پیش کیں۔ وزیرِ اعظم نے نوجوان کاروباری شخصیات سے بات کرتے ہوئے کہا کہ موجودہ حکومت کی ترجیح کاروباری سرگرمیوں کا فروغ اور ان کو ممکن حد تک مراعات دینے کے ساتھ ساتھ حائل رکاوٹوں و مشکلات کو دور کرنا اور کاروبار کے لئے موافق فضا میسر کرنا ہے۔ انہوں نے ایز آف ڈوئنگ بزنس، آن لائن منظوریوں کے نظام کو متعارف کرانے، آسان شرائط پر قرض کی فراہمی جیسے اقدامات کا ذکر کرتے ہوئے کہا کہ مختلف شعبوں میں اپنی صلاحیتوں کے جوہر دکھانے والے نوجوان ملک کا اثاثہ ہیں اور حکومت ان نوجوانوں کی سہولت کاری کے حوالے سے ہر ممکنہ اقدامات اٹھانے کے لئے پرعزم ہے۔ وزیرِ اعظم نے خاص طور پر زور دیا کہ زراعت و دیگر شعبوں میں ٹیکنالوجی اور جدت کو متعارف کرانے کے حوالے سے خصوصی طور پر توجہ دی جائے۔ وزیرِ اعظم نے کہا کہ پاکستانی مصنوعات کی کوالٹی اور معیار کو یقینی بنانے اور ملک میں معیاری لیبارٹریز کے قیام پر خصوصی توجہ دی جا رہی ہے تاکہ پاکستانی مصنوعات کوبین الاقوامی سطح پر اجاگر کیا جا سکے۔



Drop Me a Line, Let Me Know What You Think

© 2020 by 24newspk.com all rights reserved